انا مش عارفه انا بكتب ايه !! ..بس انا عارفه كويس اوي انا بكتب ليه ..
بكتب عشان موجوعه و ماحدش متقبل وجعي و بيعتبروه ضعف 
بكتب عشان حاسه ان قلبي مخلوع من مكانه و محطوط  بداله اله لضخ الدم
بكتب عشان مش عارفه اعيط علي سبيل ان الكتابه زي العياط بتحرر الروح
بكتب عشان بحاول اتعرف عليا بعد ماكنت حفظاني
بكتب عشان الحب خلاني شخص مثير للشفقه ..او انا اللي خليت نفسي
بكتب عشان انسي و انا عارفه كويس ان الكتابه تخليد  للذكريات ..بس لسه بكتب
بكتب عشان لما حولت اعبر و اقول اني اتكسر ماما قالتلي :"هو ده اللي هما عاوزينه..عاوزين يكسروكوا دي حرب نفسيه و اللي هيكسب اللي نفسه طويل .."
حولت افهمها اني وقفت اخد نفسي و اضمد جروحي بس هي يا اما شيفاني استسلمت يا اما بتحاول تشجعني اني اقوم و اكمل و اطالب بحقي و حق اللي ماتوا ..
بس انا احبط اكتر لما فكرت هو انا اصلا قدمت ايه عشان اقف اخد نفسي ..انا مقدمتش حاجه !..انا مضحتش بحاجه جمب الابطال اللي بجد ضحوا بكل شئ ..و حتي لما ارجع انا هعمل ايه ؟!
انا عارفه كويس اوي انا بحارب مين و ليه بس مش عارفه احارب ازاي ؟!!
عادتا بعرف اتعامل مع جروحي عشان تلتام و ان طولت بمسك ابرة و خيط وادوس علي نفسي و اخيطها ..

الا الجرح ده ..قولت اديله و قته عشان ميسيبش ندوب و خدوش في الروح ..بس اتضحلي اني قولت كده عشان انا فعلا مش عارفه اتعامل معاه و لا معايا ..!
جوايه طاقه غضب كبيرة اوي مش عارفه اخرجها و بتتغذي عليا و علي قولوني العصبي و تحرق في اعصابي و تجبلي صداع و رعشه في اديا و شوشرة في افكاري و ارق و ارق و ارق و كوابيس ..!

غضب *
بيقولوا مهم الواحد يطلع اللي جواه, أنا نسيت ازاي اعمل كدة
جوايا كمية غضب و وجع ساعات باحس نفسي هيقف من كثر الثقل

غضبانة, غضب مرعب
في دماغي باهبد حيطان و باكسر ازاز, باجري و ارمي نفسي في بحر من السواد, أو بانفجر و اتحول لرماد يشيله الهوا بعيد

غضبانة من احساسي الدائم بالوحدة
غضابنة من قصص التعذيب اللي مافيش حاجة اعملها غير اني اسمعها 
غضبانة على كل عيل صغير العسكر راميينه دلوقتي في السجن
غضبانة من انا ما بقيتش أنا 
غضبانة من أحلامي اللي اتكسرت
غضبانة من الحب اللي عمال يقطع في أجتحتي
غضبانة ان اللي في السجن كتير و انا مش عارفة أعمل حاجة
غضبانة ان الموت بقى شئ عادي و ساعات غاية
غضبانة اني موجوعة و مش عارفة أزيح الوجع عشان اتنفس
غضبانة اني كبرت
غضبانة اني مابقاش عندي طاقة لأي حاجة
غضبانة اني طول الوقت تعبانة
طول الوقت لازم احارب حزن و وجع و أشباح
طول الوقت لازم اتشح بخفة مش لاقياها, بعقل و أنا عقلي مضطرب, بحكمة ما املكهاش

غضبانة ان جوايا كل الغضب ده ومش عارفة أطلعه و ولا عارفة أبطل أخزن شحنات غضب جديدة

غضب *- للجميلة مني سيف