بدور عليا مش لقياني
دموع خنقاني و مش عارفه تنزل
ضيق نفس
قله اكل و قله نوم و شغل كتير

بدور عليك مش لقياك
خايفه اسيب نفسي اتعكز عليك
فاتعود ع الدلع

خايفه اسيب نفسي
اتعود علي وجودك
اللي انا عارفه اني خلاص اتعودت علي
بس بكابر

تعبت من اني طول الوقت بحاول ابقي قوية قدام نفسي
تعبت من كتر المسامحه
تعبت من مقاومة الاشباح
الاشباح اللي انا عماله اخبيها جويا ف حته ضلمه
مش عارفه اصاحبهم ولا اقتلهم
ومش بطلب مساعده

تعبت من اني علي طول تعبانه

بفكر ف ابشع النهايات
مع اني لسه ف البدايه
ع الاقل عشان لما اوصل للنهاية ابقي مستعده

مش عارفه استمتع باللحظة
بحاول احط حواجز وخيوط حرير حاده
مبتعورش غيري
محتاجاك
بس  ف صمت

لما بتلمح ضي الحزن في عنيا
وتسالني مالك
بغلوش عليه بضحكه
عشان انا مش كويسه
لكن ف نفس الوقت اانا مش عارفه ماللي

ازاي تقنع حد انك بتبقي كويس بتبقي مطمن و مش خايف
في الكام ساعه اللي بيبقي حولك فيهم
بتبقي كويس مبتبقاش انت نفسك بس بتبقي حد كويس

ايه اللي يضمن لاي حد ان الحد اللي بيحبه هيفضل معاه
ايه اللي يضمن انه هيفضل يحبه
ولا حاجه
ولا اي حاجه
مفيش ضمانات

بحس ساعات انك مش راضي تبص جوايا
وراضي بس باللي بقولهولك

خايفه لحظة النهاية تيجي و مكنش اكتفييت 

خايفه من نفسي بعدك

بكره انك مبتعرفش تفرق بين تعبي وزعلي

بتقول انك فاهمني بس ولا مره قولت انك حاسسني

كنت فاكره لما اسامح اوي و ميبقاش في زعل
هرجع شفافه تاني بس اكتشفت ان كله بيترسب
وبيسيب تقل 

نوبة فزع وهتروح لحالها لما ننام هنصحي كويسين
هي بس المشكله اننا مش عارفين ننام
متسبنيش لنفسي كتير انا بهلكني..

*طب لو حكيتلك إن المشكلة مش في اليوم ، المشكلة في الليل ،
لما كُل الأصوات بتسكت 
ومبيبقاش غير الأصوات الموسوسة اللي بتخوفك في كل ركن حواليك ، حتى في أفكارك...
طب لو حكيتلك إن الوحدة معششة جوايا ,,
ومبعرفش أنام ،هتفتكرني بدلع صح؟

طب لو قلت لك إن هنا مبقاش أمان
و مفيش حتت أمان في الكون أصلاً ...
ممكن تقول لي طب وأنا ؟ لا انت مش هتسأل أصلاً*


بفضل اقول انا هكلمك
انا هكلمك و ببساطه هقولك انا مش كويسه
انا مش كويسه خالص
بس بتراجع


خايفه متعرفش تنقذني مني..

هف


*رضوي طارق