BLOGGER TEMPLATES AND TWITTER BACKGROUNDS



عارف انا نفسي في ايه ؟

انا نفسي تشاركني رقصتي الصباحية ,قهوتي والموسيقي..
و يومي يبدا بك..وينتهي بك و فيروز بتغنيلنا خارج حدود الزمن..

و ارقص معاك تانجو في ميدان طلعت حرب قرب الفجر بفستان احمر طويل و الدنيا سكوت ..تسمحلي بالرقصه دي؟
او بفستان احمر منفوش, كحل اسود ,شعر سايب وفي ورده , رجلين حافية .مروحه
دانتيل سوده..اعرفك ياعزيزي علي سحر الفلامنكو 

و نقعد يوم كامل ع البحر نشوف الشروق ونستني الغروب ونراقب تدريجات الوان السما..

وتمشية طويله اوي في مكانا السحري و الدنيا بتمطر..

نفسي اشاركك في كل تفصيله بتحبها ..وابقي موجوده ديما ادعمك,احتويك,احميك واحبك حتي تحترق النجوم وحتي ...

ونفسي اغزلك كوفية بالوان مبهجه تحميك من برد الشتا ..تلفها حولين رقبتك فتديك احساس حضن دافي ..

واكتبلك جوابات كتير بعدد ايام السنه علي ورق اللي عليه فراشات ملونه بالوان قوس
قزح اقولك فيه كل يوم اني بحبك اكتر من اليوم اللي قبله..

تتفرج معايا علي الكرتونات اللي بحبها ..واقرا معاك الكتب اللي بتعجبك..ونسمع سوي
مزيكه حلوه تخلينا نطير مع بعض واحنا ف مكانا ..

وانا نفسي اجيبلك كل يوم ورده ..*

واعرفك علي اكتر ناس بحبهم ;جدتي النسخه الاكتر مرح مني وتوأم روحي,لولي صحبتي الصغننه اللي فيها مني كتير وناس تانيه بحبهم بس مش اكتر منك اكيد..

نفسي اجيبلك بُصله عشان تعرف تلاقي السعاده بسهولة ..وتعرف الطريق اللي هيشرق منه الحضن الدافي

ونفسي نجيب بازل 9000 قطعه اللي هموت عليه نكونه سوا وكمان نجيب كل الناس
اللي بنحبهم يساعدونا فيه ويبقي عمل جماعي قايم ع الحب :)

وكمان نفسي احبك حب تاني..حب يخلي غرورك يعلا ويخليك يا حبيبي اناني..*


نفسي اصلي معاك جماعه,,صلاة طويله كلها حب وخشوع..

ونفسي كمان في دولاب كبير يحضن هدومنا سوا..


ونفسي اووي ف مكالمه طويله جدا جدا نحطم بها الرقم القياسي لاطول مكالمه
اتكلمناها ف حياتنا..احكيلك فيها تفاصيل كتير اوي ومش هسيبك تنام يومها بدري..واحكيلك كمان عن ايام اتمنيتك فيها قبل معرفك ولما قابلتك لقيتك احلي كتير من ماتمنيتك :)

نفسي تحكيلي حدوتة طويلة ,تلعبلي في خصلات شعري,و تطبطب عليا باقاع منتظم
يمكن انام ,تلفلي الحلم ف ورق سلوفان,تجيبلي نجمه تحطها جمب سريري عشان تنور طريق حلمي وتقولي تصبحي علي ملايكه اقولك وانت منهم


وفعلا كان نفسي تلاقيلي في شنطتك مكان يساعني ف اسافر معاك ومتسبنيش لوحدي
هنا ..


*العنوان من اغنية عارف لذكري
*اسم قصيده
*اغنية نفسي احبك لانغام

لا عمر لها
تدخل سن الرشد بقبله
وتدخل سن اليأس
بانقطاع هاتفي ..

#احلام_مستغانمي































انا عايزة حضن 
حضن ابيض شفاف واسع اووي وفي نفس الوقت محكم
كبير يساعني و ميبقاش مبهوق

حضن طويل ومن حنيته احسه اطول..
انا عايزة حضن وكتف مريح اعيط عليه 
عياط مبعرفش اعيطه
عياط بشحتفه ورعشة
كتف يستحمل ملح الدموع ..
عايزة ايد تطبطب عليا من جوه
تشيل الوش القوي و النص ضحكه
تلملم فتافيتي المتنتوره 
تلزقني ب بوسه في الهوا..
عايزة ايد اقدر اتعكز عليها
عشان لما ازعل ,لما اغضب ,لما تكسر امسك فيها اووي..
انا عايزة عنين تبص ف عنيا ومتغلطش في قرايتي
مش بس تعرف اني مكسورة و خايفه
لا كمان تعرف السبب
اصل البوح عن الوجع ومعاه بيوجع..
انا عايزة حد يعرف يحتويني كلي علي بعضي
بالمليون شخصيه اللي جوايا
يتعلم حضن العنين و الاحتواء عن بعد
يعرف قد ايه النوم في حضن الاحساس بيريح
يحس بالاشارات اللي طالعه مني و يترجمها
ومن غير كلام يخطفني يخبيني جواه 
ويحميني مني..


الخلاصه: انت اللي انا محتاجاه ..انت بس ومش اي حد تاني ..فارجوك متخلنيش اتعكز علي حد غيرك وانت موجود! :(