عمرك جربت تبعت لنفسك جواب في البريد ؟
 جربت قبل ماتنام تفضل تحكي مع ربنا لا مش تدعي تحكي كتير علي حاجات هو اصلا عرفها؟
جربت تحب حاجات من غير متحاول تمتلكها ؟
جربت تفتح الفيفوريت عند صحابك الافتراضين علي التويتر وتقرا الكلام اللي نفسهم يقوله واللي حاسين به والكلام اللي عجبهم؟
جربت ماتغضبش من الوحده وتعرف تستمتع بيها ؟
جربت لما تتخنق تشغل اغاني وتطفي النور وتفضل ترقص كتير وانت بتعيط في الضلمه؟
جربت تقرا لحد اجزاء من كتاب عجبك عشان يفتكر الكلام بصوتك لما يقراه تاني؟
جربت ترسم لكل حد بتحبه رسمه صغيرة و كلمتين علي ضهرها مع التاريخ ؟
جربت تسمع صوتك الجواني اللي عمره مابيكدب عليك بس انت طول الوقت بتحاول تغلوش عليه ؟
جربت تنام و الشباك مفتوح عشان اول شعاع شمس يصحيك ؟
جربت تقول للناس تصبحوا و تمسوا علي خير طيب جربت تقول لنفسك وتتمنالك يوم جميل ؟
جربت تبطل تهرب و تواجه ؟
جربت تركز مع الالوان وتشوف تاثيرها علي حياتك ؟
جربت تعمل فشار وتنسي تغطي الحله فيفضل الفشار يطير في كل حته في المطبخ ؟
جربت تحرر روحك من الغضب و الكرهه عشان تبقي شفافه ؟
جربت تركز و تهتم بكلام مايهمكش بس الشخص اللي بيحكيه يهمك ؟
جربت تخلط الالوان وترسم لوحه بتعبر عنك بس وتحلل انت رسمت ايه ؟
جربت تغزل لحد انت بتحبه كوفيا تريكو عشان تديله احساس الحضن في الليالي البرد ؟
جربت تسامح بسهوله و بسرعه مهما حصل عشان تحافظ علي روحك شفافه ؟
جربت تحب حد لدرجة انك تسمع موسيقي لما تبص في عينه و تشوفه وهو جاي حوليه نجوم صغيره بتلمع وفراشات؟
جربت تحاول تركز في الاشارات الكونيه و العلامات سماوية و تحاول تفك شفرتها وتؤمن بيها ؟
جربت تسمع صورة مريم وتتخيل نفسك جمبها بتحاول تخفف عنها وتطبطب علي كتفها ؟
جربت تعمل سيرش علي اي حاجه غريبه تيجي في دماغك وتقرا عنها وتفهمها ؟
جربت تعمل صندوق تناتيف ذكريات لكل حد مميز في حياتك تحط فيه صوره او ورقه مكتوب عيها اغنية ,تذكرة سينما ,رسمه, ورقة مصاصه ؟
جربت لما تنسي تقلب الكيبورد من عربي لانجلش او العكس تقرا الكلام الغريب اللي اتكتب ؟
جربت وقت الفجر تفتح الشباك وتبص فوق و تحس صوت الاذان جاي من السما ؟