لما تتوجع من الحاجه مره و اتنين و عشره
وفي كل مره تتوجع اووي..كأنها اول مره
وفي كل مره تستغرب ليه مش بتاخد علي الوجع
نفس الموقف ..وشوش بتتغير
نفس الوجع..وانا مش عرفه اعتداده
بتوجع..بتكسر..بتفتفت..
اتجمع..التأم..اتعلم
وهكذا..

كل مره بعرف غلطه
كل مره بتفاده الغلطه
بس بتطلع غلطه جديده

كل مره بلقيني في الاخر واقفه بحارب وحدي
عمري مابفقد الامل في الناس
بس الناس بتبطل تؤمن بيا

اكبر الخيانات مش النسيان
لا
اكبر الخيانات الخذلان..


"وعلى عكس قانون الزمن والنسيان..
الألم زاد مقلش جوايا
زاد أكتر من امبارح وأول وبداية الاسبوع"*

الوجع اللي مش راضي يروح
 النفس اللي مش بعرف اخده
النوم اللي مش بيجي
الشغل اللي بيبوظ
صوتي اللي بيترعش
ضحكتي اللي مش بتضحك
وشي الاصفر وعيوني الدبلانه
انا تعبت ..

عن بداية اليوم اللي بحاول ابتديه صح وبفشل كل يوم
عن التعب من اي حاجه وكل حاجه ومن غير ماعمل حاجه تعبانه
عن نهاية اليوم  والنوم اللي عمره عمره مابيجي بسهوله
عن الكوابيس والاحلام المرهقه و التفاصيل المربكه
عن عدم الرغبه في البوح ولا القدره عليه
عن الغباء البشري و الناس اللي بتقفلني
عن الدموع اللي مابتنزلش ولا بتطلع..بتوجع

عن انعدام الرغبة في المقاومه ..
و الاستسلام ببساطه و بالتصوير البطيئ للاكتئاب ..!

"يارب ماتخليش الالم يعدي عليا متخليش الوجع يخدني فيعدي الدرس يفوت كده قدام عيني 
يارب خليني من قلب الوجع اتولد من جديد "


العنوان من اغنيه  تدور وترجع لدينا الوديدي
*رضوي طارق