عزيزي يحيي

تحيه طيبه و بعد ..احب اقولك انك وحشتني بغباء ..واني قررت اكتبلك رساله احكيلك فيها شوية حاجات انت اكيد مش هتبقي مهتم تعرفها ..بس ما علينا اولا لازم تعرف اني مش فاكره الرسايل كانت بتتكتب ازاي ..بس هحاول..
ثانيا غير انك واحشتني و اني مفتقداك انا بقيت بخاف عشان يا الناس مش بتديني  وقتي اشبع منهم او انا اللي مش بطالب بوقتي ..المهم ان ناس كتير اوي وحشاني ومش بشوف حد ..بس زي ما انت عارف احنا خلاص كنا هنتقابل يللا تتعوض..
اه كنت بقولك اني بخاف ..بخاف الناس تعمل زيك ويقرروا يمشو من غير ما يقلولي سلام..انا مش زعلانه منك بس كان نفسي تستني يومين اشوفك ولو حابب بعدها امشي .. ومش بلومك انت بس واحشني
عارف.. البنوته العسوله اللي اكبر مننا بسنه اللي انت خلتني اتكلم معاها واتعرف عليها وانت مش واخد بالك سالت عليا من فتره بس انا مردتش عليها ..عشان لقيتك واقف بيني و بينها و ده كان كفيل انه يتوه الكلام مني و ينيمني معيطه ..
قالتلي انها بتتمني اني اكون لسه برسم فراشات ..
عمتا انا مش عارفه اتكلم معاها عشان اول صوره بتيجي ف باللي انا وهي واقفين في وسط قاعه مليانه ناس كتير لبسين اسود واحنا حضنين بعض و بنعيط و بنطبطب علي بعض بتوتر ..شفت ازاي عندي حق ..بس ماتقلقش انا عارفه انها مش هتزعل حاسه انها بيحصلها كده بردو..
انهارده اتكلمت عليك كتير قولتلهم انت احسن حد حصل وانك كنت نقي اووي وكنت بتدافع عننا واحنا في المدرسه لما حد تحصله مشكله ..بس ماقولتلهمش قد ايه انت واحشني
اه وقلتلهم كمان ان يمكن لو كنت متعوده اشوفك كل يوم يمكن كنت اقتنعت انك مشيت ..
الكتابين اللي جبتهملي هديه في عيد ميلاد صاحبتنا بدون مناسبه حطاهم تحت مخدتي بس مش قادره اقراهم انا عارفه انك جايبهملي من زمان بس دخلو في وسط الورق و الكتب ولسه لقياهم من كام يوم..
عارف لقيت ايه كمان ورقه مقطوعه من كراسه مكتوب عليها بالرصاص "ماتعيطيش" ..!
صحابنا وحشوني اووي هما كمان بس زي ماتقول كده خايفين نتقابل و بنهرب من بعض ..
انا مش عارفه ايه الهدف من الرساله ..وعارفه انك ممكن تكون مشغول شويه ومش فاضي تبص علينا ..كان نفسي اقولك ماتقلقش احنا هنبقي كويسين ..بس ماينفعش مش هاعرف..اكدب عليك يعني ؟!
ليك صوره انت واقف و وراك نجوم فضي بتلمع متعلقه في كل حته و في واحده منهم انت حطتها في جيبك ..انا كل يوم بفضل بصه للصورة دي لحد ما انام ..ديما بتخيلك كده في مكان كله نجوم بتلمع وممكن نحط مع النجوم شوية فراشات بتلمع كمان..فاكر لما كنت ديما تقولي" انتي فراشة بمبي قاعده جمبي "..
انا بحاول ماعيطش اهو زي ما انت كتبلي ع الورقه واسمع الكلام ..بحاول والله بس مش عارفه ..
انا هروح انام عشان مازعلكش اكتر من كده..

يللا تصبح علي ملايكه
صاحبتك المخلصه